ႏူအဘိျပာယ္(လဟုီ) ဒွ္အာအဘိႀတာဲ(လိက္)

ႏူအဘိျပာယ္(လဟုီ) ဒွ္အာအဘိႀတာဲ(လိက္)

 

အရာမဟုီဂး လဵဒဿံင္အပႜဲအရာဍဳင္ကြာန္ မေစန္ဆက္ကၜဳင္ သှာံဗြဲမလအ္တအ္ဂွ္ အစာေကှဟ္တအ္ ခ်ဴေကွ္စုတ္ အပႜဲလိက္(သၜ႐ုိတ္)ရ။ ကာလဂွ္ မှိဟ္မလဵဂွ္ ဒွ္အစာေကှဟ္တအ္တုဲ မှိဟ္မပင္မွိင္ဂွ္ ဒွ္အာမှိဟ္မဗွ္လိက္တအ္ရ။

ဗုီကၜာေတအ္ မှိဟ္မလဵတအ္ဂွ္ တီလဝ္မှိဟ္မပင္မွိင္တုဲ ညံင္ဂြံကိတ္ည႘ကုႝ ညးမပင္မွိင္ဂွ္ လဵကၜဳင္ရ။ ကာလအစာေကှဟ္တအ္ ေကွ္ခ်ဴပ႐ူဂွ္မၢး ပုရိသာတ္ညးေတအ္ ညးဂွ္ေရာကၜးကၜးဂွ္ ညးေတအ္ဂြံတီေကတ္ ဟြံမာန္ရ။ ဟိုတ္ဂွ္ရ အစာေကှဟ္တအ္ဂွ္ ခ်ဴအတိုင္ပဿိက္ပုရိသာတ္ဟြံေသင္ ခ်ဴအတိုင္အကာဲအရာ အပႜဲပ႐ူတအ္ရ။ တုဲပၜန္ ဗုီကေလင္ react ႏူပူရိသာတ္တအ္ဂွ္ ဗုီလုႝေလဝ္ အစာေကှဟ္တအ္ ဂြံတီေကတ္ ဟြံမာန္ရ။

 

ႏူလဟုီ ဒွ္အာလိက္တုဲ

-       လဟုီမလဵနကုႝပါင္ဂွ္ ပေကၜအ္ဒတန္ နကုႝလိက္တုဲ ပ႐ူဂွ္ဒွ္အာကိုန္ဂစိုတ္။

-       မှိဟ္မလဵဂွ္ ဒွ္အာ အစာေကှဟ္တုဲ ရမ္သာင္ညးမလဵဂွ္ ဒွ္အာနကုႝလိက္။

-       မှိဟ္မပင္မွိင္ဂွ္ ဒွ္အာညးမဗွ္လိက္ ပ႐ူဒဒွ္အိုတ္သုီဂွ္ ကလိဂြံႏူလိက္။

-       အခိုက္ကှာပေကာံညးသကအ္ အခိင္တုပ္ပ္တုဲ ကလင္ဂွ္ ျပးဇးအာတုဲ ဒွ္အာဗုီညးကုႝညး ဗွ္ေကတ္တ္၊ ပေရင္စုက္လုက္ေရင္သကအ္ဂွ္ ေအာန္ေစွ္အာ။

ပ႐ူေႀတံတအ္ဂွ္ ဗုီခ်႘ဒရာင္တအ္ဂွ္ ေသာဲေသာဲေျပာဲေျပာဲဂွ္ ဗြဲကိုန္ဂစိုတ္ ဟြံေဖ်ဟ္လဝ္တုဲ အတိုင္ပဿိက္ ညးမလဵဂွ္ေဟင္ ဗုီမကိတ္ည႘ဂွ္ ဖန္လဵအာရ။ ညံင္ရဵသာ္ဂွ္ကုီ ကာလအစာကဝိတအ္ မခ်ဴပ႐ူတအ္ အပႜဲလိက္ဂွ္ ဗုီပဿိက္စိုတ္ညးဂွ္ ညးကေလင္ပေယဝ္ ဗေပင္စုတ္လဝ္ဂွ္ ဂြံဆုႝေကတ္မာန္ရ။ ဥပမာ ဗုီသဘာဝၿဂိဳပ္ဒုႝတအ္ ဗုီအေရဝ္ကေရဝ္ကေရာတ္တအ္ ဗြဲမဂၜိဳင္လုပ္အာ အပဲႜပ႐ူဂွ္ရ။ မအေရဝ္တအ္ကုီ သဘာဝတအ္ကုီဂွ္ ဗုီကတုႝဒွ္ဒဿံင္ အပႜဲအခိင္အစာကဝိဂွ္ လုပ္အာအပႜဲပ႐ူဂွ္မာန္ရ။ ကေပါတ္အရပ္အရာအပႜဲပ႐ူတအ္ဂွ္ေလဝ္ သၜာဲစုတ္ကေပါတ္ အခိင္အစာကဝိတအ္ ဒွ္မာန္ကုီရ။ ဟိုတ္ဂွ္ရ ပႜဲအရာလၛတ္ပ႐ူဂွ္ အခိင္လုႝဒွ္ကၜဳင္ ကၜဳင္ႏူလုႝေရာဂွ္ လၛတ္ရံင္ေကတ္ ဆမအေရဝ္တအ္သဿးဟြံဂြံရ။ နကုႝပေရင္ဓဝ္ပေတွ္မှိဟ္တအ္ဂွ္ လၛတ္မၢး ဒဒွ္ရ ပ႐ူဏအ္ကၜဳင္ဂေကာံမှိဟ္လုႝဂွ္ လေဆာဝ္တီေကတ္မာန္ကုီရ။

ဥပမာ ပုံမဒံက္ေခဝ္ဝြံ စုႝကုႝတၛဲဏအ္ ပု႙တအ္လဵဒဿံင္ ညံင္ဂြံကိတ္ည႘ ကုအကာဲအရာပု႙တအ္ရ။ ပုံဂွ္ ေစန္ဆက္ကၜဳင္ ႏူအခိင္လုႝေရာဂွ္ ညးမြဲကုီ ပိုင္ျခာေကတ္ ဟြံမာန္ရ။ အတိုင္ဒံက္တာေမန္ေတန္မန္ မဟုီလဝ္မၢး ညးဂြံဒေဒွ္ ကုဂကူခမာမြဲတုဲ ညးတအ္လဵစိုပ္အာ ပ႐ူပုံမဒံက္ေခဝ္ရ။ ဒဒွ္ရ ပုံမဒံက္ေခဝ္ဝြံ အပႜဲဂကူခမာတအ္ေလဝ္ ႏြံဒဿံင္ကုီဂွ္ ညးတအ္ဂြံတီေကတ္ရ။ ဟုီသာ္ဂွ္မၢး ႏူစအခိင္မန္ကုႝခမာ ဒွ္ဒဿံင္မြဲဂကူ မြဲဍဳင္ေတအ္ဂွ္ရ မန္တအ္လဵကၜဳင္ဒဿံင္ ပုံဂွ္ ဟုီေကတ္မာန္ရ။ အတိုင္အစာဝင္တအ္ မပေတွ္ေကတ္မၢး သှာံၐိုတ္ ဒစာံဗြဝ္ကၜံဂွ္ မန္ကုႝခမာ ဒွ္အာဍဳင္တှဟ္ျခာ ဂကူတှဟ္ျခာေရင္သကအ္ရ။ ဟုိတ္ဂွ္ရ ပုံမဒံက္ေခဝ္ဝြံ မန္ပု႙စလဵကၜဳင္ ေအာန္အိုတ္ႏူၐိုတ္ ၃-၄ ဗြဝ္ကၜံေတအ္ ဒွ္မာန္ရ။

 

အခိုက္အစာပုံ အခိုက္အစာဗြဟ္

အခိုက္လဵပုံ (ဝါ) အခိုက္အစာပုံဂွ္ မှိဟ္မစ႘ကၜးတအ္ အခိင္သဝ္တၛဲမၢး မှိဟ္ပႜဲဓ႐ုိက္ (ဥဳံ)ဂွ္ ေကာံကၜဳင္အပႜဲသၛိညးဂွ္တုဲ ညးလဵကုႝပုံရ။ ပုံမန္ပု႙ဂွ္ ပုံဇေမၜအ္ ပုံဇမၜိင္ ႏြံၐါသာ္တုဲ ပုံဇေမၜအ္မၢး မြဲအလန္မြဲပုံတုဲမာန္ကုီေလဝ္ ပုံဇမၜိင္တအ္ဂွ္ လအ္ကုႝဂိတုမာန္ရ။

အခိုက္လဵပုံတအ္ဂွ္ ပႜဲဇဿာပ္ဂကူဂွ္ ဂြံဆုႝေကတ္မာန္ကုီေလဝ္ အခိုက္အစာဗြဟ္ဂွ္ ပႜဲဂကူတှဟ္တအ္ ဂြံဆုႝေကတ္ ဝါတ္ေကြဟ္ဟ္ရ။ ဗြဲေတဿင္ ပႜဲသၛိကမၼထာန္တအ္ဂွ္ ေကာ္နင္အစာဗြဟ္တုဲ ဗွ္လိက္ပုံမန္တအ္ရ။ ဟိုတ္ေဍဟ္ဂွ္ မှိဟ္ဒးေထာအ္လဝ္ အပႜဲသၛိဂွ္တုဲ တၜသၛိတအ္ဂွ္ လၛဳဒဿံင္စိုတ္ ေအာန္ဒဿံင္စိုတ္တုဲ မှိဟ္အရာပ္ကေလာေဒအ္တအ္ ကၜဳင္မံင္ကုႝသကအ္ရ။ ညံင္အခိင္မှိဟ္တအ္ ဟြံဂြံဒွ္အာသဿးသဿးတုဲ ေကာ္နင္အစာဗြဝ္တုဲ ကုႝဗွ္လိက္ရ။ ဟုီမြဲသာ္ပၜန္ သၜာဲေကၜအ္အ႐ုီစိုတ္မှိဟ္တအ္ ႏူလပၚကမၼထာန္ဂွ္ရ။ ႏူဂွ္လအ္အာတုဲ ဒွ္အာအခိုက္ကှာေကာန္ဂကူမြဲ မစိုပ္ကုႝသၛိကမၼထာန္ရ။ ပႜဲအခိုက္ဗဿာတအ္ဂွ္ ဟိုတ္ေဍဟ္ဂွ္တုပ္ပ္ရ။ ဆဂး ဗုီေပၜင္အခိင္ဂွ္ ဟြံတုပ္ေရင္သကအ္ရ။ ညးတအ္ဂွ္ ေကာံညးသကအ္တုဲ ေဝင္ေဖဝ္ရ။ လဿဳဟ္မၢး ေဝင္ေဖဝ္ဂွ္ ဒွ္အာအခိုက္ကှာဗဿာ မစပ္ကႝုသၛိကမၼထာန္ရ။

သြက္အစာဗြဟ္တအ္ဂွ္ ညးတအ္နကုႝလိက္ (ဝါ) နကုႝဇဿန္လင္ကာလ်တ္တ္တုဲ ဗွ္ဂွ္ရ ပႜဲရမ္သာင္အစာဗြဟ္ဂွ္ ရမ္သာင္မဒြက္တိတ္ဒဿံင္တုဲ ပေရကုႝဂၜံစိုတ္မှိဟ္တအ္ ညံင္ဟြံဂြံလၛဳမာန္ရ။ အစာလၛႝဳဂွ္မၢး အၾကာဂွ္ သုီပလးကုႝအဓိပၸါယ္ညိညဏီရ။

ဗြဲမဂၜိဳင္မၢး ပုံဇမၜိင္မဇန္လဝ္ နကႝုဇဿန္လင္ကာဂွ္ ညးတအ္ဗွ္ရ။ ပုံဇမၜိင္တအ္ဂွ္ စုႝကုႝလဿဳဟ္ေသွ္ဒဿံင္ အၾကာသၜ႐ုိတ္တအ္ဏီတုဲ ပုံလၛႝဳတအ္ဂွ္ ပႜႝဳပုံနကုႝလိက္ကှပ္ေလဝ္ ႏြံရ။ 

 

 ႏူပုံမဟာဇန္ ဒွ္ကၜဳင္ပုံဇဿန္

ပႜဲအရာမစပ္ကုႝပုံဝြံ ပုံတမၜာတမၜာ မဟုီလဵကၜဳင္ဂၜိဳင္ကုႝေတှာဝ္ ဂၜိဳင္ကုႝအဆက္တုဲ ဟြံတီညးလုႝမဒွ္အာကဝိ အခိင္လုႝမဖန္ဗဒွ္တအ္ဂွ္ ေကာ္ခဵစ ပုံမဟာဇန္ရ။ မုဟိုတ္ေရာမၢး ပုံတအ္ဂွ္ ညးလဵကၜဳင္လဝ္ ကုမဟာဇန္တအ္ သြက္ဂြံပေရေလဿာင္စိုတ္ သြက္ဂြံေဒၢတ္ဂိုင္ေကတ္ ဒေဂတ္မခိုဟ္တအ္ရ။ ပႜဲဘာသာသအာင္မၢး ညးတအ္ေကာ္စ ပႜဲဘာသာေဒသသမၜဳင္က်ာ ဒိန္မက္ နဝ္ေဝ သြိတ္ေဒန္တအ္မၢး folkeventyr (folke = မဟာဇန္ eventyr = ပေရင္ဆုႝဗဂေတဿင္/ပုံ) တုဲ အပႜဲဘာသာအင္ကလိက္ဂွ္ Folklore ရ။

ပုံဟုီဂွ္ ဒွ္အရာအခိုက္ကှာလဵပူ ဂကူမှိဟ္တအ္မြဲ၊ ဒွ္အရာ fantasy ေကာန္မှိဟ္တအ္တုဲ ဗြဲမဗဗြဲဂွ္ မံက္တိတ္ကၜဳင္ဒဿံင္တဿိတဿိဟဂွ္ရ။ ညးလၛႝဳတအ္ဂွ္ ဒုင္သဇိုင္ ကုပုံမဟာဇန္မြဲမြဲတုဲ ကေလင္ဖန္ပတိုန္တဿိ ညံင္ဂြံခိုဟ္တိုန္ ႏူေႀတံေလဝ္ ႏြံရ။

ေပှာဝ္ကုႝပုံၐါဂကူ ပုံဇမၜိင္ ကုႝ ပုံဇေမၜအ္တအ္ဂွ္ ပုံဇမၜိတအ္ဂွ္ ဟိုတ္ႏူအခိုက္ကှာ အစာဗြဟ္တုဲ နကုႝလိက္ဇဿန္လင္ကာဂွ္ ေသွ္ဒဿံင္ ပႜဲသၜ႐ိုတ္တအ္ လၛႝဳဂွ္မၢး နဒဒွ္လိက္ကှပ္ဂွ္ တက္ပတိတ္လဝ္ေလဝ္ ႏြံရ။ ဥပမာပုံမိေဍာင္ေကွ္ထဝ္၊ ပုံၿဗဵရတ္ဏင္ကင္ရ႘တအ္။ ဆဂး ပႜဲဇေမၜအ္ မလဵဟုီဂးကၜဳင္ဒဿံင္တအ္ဂွ္ ဟြံဂြံခ်ဴစုတ္ နကုႝအခဝ္တုဲ ေကၜအ္အာတဿာဂလိုင္ရ။ က်ာ္ေဇှာ္အစာေစြာအ္ ပေကာံခ်ဴလဝ္မြဲကှပ္ေဍတ္ နကႝုယဿဳသၜ႐ုိတ္ ”လိက္္သၜပတ္ေပါရဏံေပါရဒံါ” ဂွ္ ႏြံဒဿံင္ပုံ ၂၃ ပုံရ။ အပႜဲနိဒါန္လိက္ညးဂွ္ ညးခ်ဴလဝ္ ”ဂလာန္ဒတန္ကဝ္ ဟုီကၜဳင္ကၞဝ္ေရာင္” မဂြံအဓိပၸါယ္ ဂလာန္မဟုီကၜဳင္ ႏူကဝ္မတန္ရ။ ပုံလၛႝဳတအ္ဂွ္ ကၜဳင္ႏူဇာတ္က်ာ္တအ္ေလဝ္ ပါဒဿံင္ကုီရ။

လဿဳဟ္မၢး ပႜဲမဂၢေျဇန္ ဂ်ာေနဝ္တအ္ဂွ္ ပုံတိတ္ဒဿံင္တဿိတဿိ ေပင္ထာတ္ရ။ ပဲါႏူဂွ္ပၜန္ လိက္ကာေတာန္ ဗ႘ဒ႘ယိုကာေတာန္တအ္ဂွ္ေလဝ္ တိတ္ဒဿံင္ေပင္ထာတ္ရ။ ဆဂး ပႜဲမန္ပု႙ဂွ္ တိတ္ေအာန္ေကြဟ္ေကြဟ္ရ။ တိတ္ဒဿံင္အၾကာမဂၢေျဇန္ ဂ်ာေနဝ္တအ္ဂွ္ လေဆာဝ္အစာကဝိတအ္ ဟြံဗမံက္ ကုႝလဝ္သမၲီတုဲ ဒဒွ္ရ ပုံအစာကဝိ(အစာေကှဟ္)ဂွ္ရ ခ်ဴဟာ ဟြံေသင္မၢး ကေလင္ခ်ဴပတိတ္လဝ္ ပုံမဟာဇန္တအ္ဟာဂွ္ ေကတ္ဟြံဒးရ။ ယဝ္ရပုံဂွ္ ခ်ဴဇန္လဝ္ တီဒဿံင္အစာေကှဟ္မၢး ညးေကာ္စ ပုံဇဿန္ရ။

 

ပုံ ေကုာံ သုဘာသိုတ္

သုဘာသိုတ္ ဒွ္မအေရဝ္မေစန္ဆက္ကၜဳင္ ႏူပါဠိ သုဘာသိတ မဂြံအဓိပၸါယ္ဂလာန္ထဿိက္ရ။ သုဘာသိုတ္မန္ဝြံ တုပ္ကုႝဂလာန္ေခတ္လဿဳဟ္ (ဝါ) ဂလာန္ဂကူသအာင္ တ႘အဝ္ရ႘ theory ဟုီမာန္ရ။

လညာတ္သမၲီမြဲမြဲ မိက္ဂြံကုႝညးဂမၜိဳင္ သမၲီဒးေလာဲတုဲ ဇန္ဗဒွ္ပတိုန္ပုံအာဂုီေလဝ္ႏြံရ။ ဥပမာ ဂလာန္ ”အိုတ္ကသပ္ ခ်ပ္ကုႝဆုေဇှာ္။ ကေဇှာ္ တဵပႜဲဝင္လယိုဟ္ ဂလာန္သဒိုဟ္သႜိဳက္ တဵပႜဲညးေဇှာ္။”  ဂွ္ညးတအ္ ဇန္လဝ္ပုံ ဨကရာဇ္မြဲ ကုႝေကာန္ဇကုထပွ္ဂွ္ အာဂၜာဲသြဟ္ဂလာန္ မသုန္တင္ ပႜဲဍဳင္တှဟ္မြဲတုဲ ေကာန္သဿိင္တအ္ စိုပ္အာဍဳင္ဂွ္တုဲ ဗက္အာသဿာန္ ဆညးမြဲကုီ ဟြံတီေကတ္သြဟ္ လတူဂလာန္မသုန္ဂွ္ရ။ ကာလဂွ္ ေကာန္ဒေဒအ္သဿိင္ဂွ္ အာတ္အေခါင္ေကာတအ္ သြက္ဂြံအာသဿာန္ ပႜဲထာန္တှဟ္ရ။ ပႜဲဂၜံင္သဿဝ္တံၿဇဲသုံဂွ္ ေကာန္ဒေဒအ္သဿိင္ဂွ္ တိက္လွိင္အာတုဲ ေဒဝတဵကုႝနိမိတ္လပအ္ ”ယြံမင္ဗၜာဲ ’ကေဇှာ္တဵပႜဲဝင္လယိုဟ္ ဂလာန္ၿဇိဳဟ္တႜိဳဟ္ တဵပႜဲညးေဇှာ္’ ဂလာန္လိုက္ဗာတအ္ ဟုီေသင္ဟာ တၜအဲျပာပ္အာ ပႜဲဇိုင္ၐ႘ေဇှာ္ေတအ္တုဲ လထဵဗ်ဳမြဲ ဍန္ဒဿံင္ကဂွ္ မင္ဗၜာဲသဿာန္တုဲ ဂြံတီေကတ္ရ”။ ေကာန္ဒေဒအ္သဿိင္ဂွ္ ကလိဂြံဂလာန္ဂွ္တုဲ စဵကၜဳင္ဍဳင္ ဟိုတ္သွ္ဂလာန္မသုန္တင္မာန္တုဲ သဿိင္ဇိုန္ကုႝနန္ ကုေကာန္ဒေဒအ္ဂွ္ရ။

သာ္ဂွ္ဟြံေသင္ ပ႐ူမြဲမြဲဒွ္တုဲ ညးတအ္ဇန္ပတိုန္ ဂလာန္သုဘာသိုတ္ေလဝ္ႏြံကုီရ။ ဥပမာ တၜညးဝါေရဝ္ေရာဝ္ မဒွ္သဿိင္ဍဳင္မတၲမ ကုႝ တၜညးတာရာဗညာ မဒွ္သဿိင္ဗေဂါဂွ္ ကႜိဳင္ဗတာင္မန္ဗေဂါၐါ ႐ုံဗင္ဒက္မိတ္ေရင္သကအ္တုဲ ေကာန္တၜညးဝါေရဝ္ေရာဝ္ ေမဝ္ဏင္သိန္ဒ်ာဂွ္ ကုႝဗၥတာရာဗညာ၊ ေကာန္တာရာဗညာ ေမက္ဏိန္ဇဵလွဂွ္ ကုႝဗၥတၜညးဝါေရဝ္ေရာဝ္။ ကာလပှာန္ဗုကာံကၜဳင္ဗတုိက္ဂွ္ ညးၐါပေကာံျဒဟတ္တုဲ ထေဍင္ေကၜအ္ပှာန္ဗုကာံမာန္တုဲ တာရာဗညာ စြံစိုတ္စှာဲ ဂစာန္ဂစိုတ္ တၜညးဝါေရဝ္ေရာဝ္တုဲ စိုပ္ေကှာတ္ တၜညးဝါေရဝ္ေရာဝ္ ကလိဂြံဇမှးတုဲ ႀကိဳင္စြံလဝ္အခ႐ုိင္ရ။ စိုပ္မြဲတၛဲ တာရာဗညာ ဂစာန္ဂစိုတ္ တၜညးဝါေရဝ္ေရာဝ္ပၜန္တုဲ တၜညးဝါေရဝ္ေရာဝ္ ဒးေဖ်ဟ္အသံဂစိုတ္ ကုတာရာဗညာရ။ ေကာန္တာရာဗညာၐါ ၾသင္ျဂ႘ ကုႝ ၾသင္ငၛာဲဂွ္ ကုႝလြ႘ဗစ ကေရာမ္ဇကု ဒှာဲဗြဲမဒးရးကုီေလဝ္ ကာလေကာန္ငၛာ္ၐါဂွ္ ေဇှာ္ေဂါဝ္တိုန္ဂွ္ ကေလင္ဂစိုတ္ေကၜအ္ အပါေနာ္ဇကုရ။ ကာလဂွ္တၜပညာတအ္ ညာတ္ေကတ္ဟုိတ္ဂွ္တုဲ ေကၜာန္စြံလဝ္ဂလာန္မြဲ ”ဗာ္ၐဝ္ပလဝ္ဓလ ဗာ္မပလဝ္ေကာန္”။

ဂလာန္သုဘာသိုတ္မန္တအ္ဂွ္ မှံဳကုႝဥပမာ ဥပေမယ်တုဲ ဗြဲမဗဗြဲကုႝဒှာဲဂွ္ ကံက္ေကတ္ပြံက္တှဟ္ဟ္သာ္မာန္ဂွ္ရ။ သုဘာသုိတ္တအ္ဂွ္ နဒဒွ္ကြတ္ေလာက႘ ညံင္ဂြံမာန္အေရဝ္ညးလိုက္တအ္တုဲ ဗၜာဲဘာတအ္ ဒးေဗၲာန္လၛတ္ကုီရ။ တုဲပၜန္ ဆႝုပ႐ူမြဲမြဲမၢး ပကိတ္ကုႝဂလာန္သုဘာသိုတ္တအ္တုဲ ေသၛဝ္ေဂၜပ္တှဟ္ဟ္သာ္ရ။

(တင္စဿတ္ လိက္ဝြံ ဒွ္မူအေျပာံ ဒွ္အခိင္အေဃာမပေကာံခ်ဴဂွ္ရ တၜပညာတအ္ ဆုႝဂဗတင္ဂှင္မြဲမြဲမၢး ေဗၜတ္ကုီ ဒးကုီ ထပ္ဗေပင္ကုီမၢး ၾသဝ္ကုႝသမၲီညိ။ ယဝ္ကုႝ တင္သမၲီမြဲမြဲမၢး တင္ဂုန္ဗြဲမေဇှာ္ရ။) 

ေကတ္နင္ႏူ ဗ႘ထဝ္မန္ျဇာ